ᐱᒍᓐᓇᓯᒍᒪᕋᔭᕐᑕᕗᑦ: ᓄᓇᕕᒻᒥᐅᓕᒫᑦ ᖃᓄᕐᑑᕆᐊᕈᑕᐅᔪᓂᑦ ᐃᓕᑦᓯᐸᓪᓕᐊᓕᕐᓂ ᐱᒍᓐᓇᓯᒍᓐᓇᖁᓪᓗᒋᑦ ᐃᓕᓐᓂᐊᒋᐊᓪᓛᓂᕐᒥᑦ.
ᓄᓇᑦᓯᓐᓂ ᐃᓕᓴᕐᕕᒻᒥ ᐱᔭᕇᕐᓂᐅᖃᑦᑕᑐᑦ ᑲᑎᑕᐅᓯᒪᓂᖏᓐᓂᒃ ᐃᓱᒫᓘᑎᖃᕐᐲᑦ? ᐃᓅᓱᒃᑐᓂᒃ ᑲᔪᖏᕐᓭᒍᒪᕖᑦ ᐃᓕᓴᕐᑕᒥᓐᓂᒃ ᑲᔪᓯᑦᓯᐊᖁᓪᓗᒋᑦ ᐊᒻᒪᓗ ᐊᑐᐃᓐᓇᐅᒐᔭᕐᐲᑦ ᑕᒪᑦᓱᒧᖓ ᓴᐳᒻᒥᓂᖃᕆᐊᒥᒃ?
ᑕᒪᑦᓱᒧᖓ ᐊᖏᕈᕕᑦ ᐊᐱᖅᓲᑎᒧᑦ, ᑎᓕᔭᐅᕗᑎᑦ ᐱᓇᓱᐊᕐᓂᐅᒍᓐᓇᕋᔭᕐᑐᓂᒃ ᐊᓪᓚᖁᔭᐅᑦᓱᑎᑦ ᐃᓱᒪᑖᕈᑎᑦᓴᓂᒃ ᑮᓇᐅᔭᑎᒍᑦ ᐃᑲᔪᖅᓯᒍᑕᐅᔪᓐᓇᕋᔭᕐᑐᓂᒃ ᐃᓱᒪ-ᑯᓐᓄᑦ ᐃᓕᓴᕐᕕᒻᒥ ᑲᔪᖏᖅᓭᓂᕐᒧᑦ ᐱᓇᓱᐊᕐᓂᐅᔪᒧᑦ.
-
ᖃᓄᐃᑦᑐᒥᒃ ᐱᓇᓱᐊᕐᓂᒥᒃ ᐃᑲᔪᖅᑐᕋᔭᕐᐲᑦ?
-
ᐱᓇᓱᐊᕐᓂᒥᒃ ᓴᐳᒻᒥᒐᔭᕐᑐᒥᒃ ᐃᓕᓴᕐᕕᒻᒥ ᑲᔪᖏᖅᓭᓂᐅᔪᒧᑦ ᐱᒋᐊᕐᓗᓂ ᐱᐊᕋᐅᑉ ᐃᓕᓴᕆᐊᓕᕐᓂᖓᓂᑦ ᐳᖅᑐᓂᕐᓴᒧᑦ ᐃᓕᓴᕐᓂᖓᓄᑦ ᑎᑭᓪᓗᒍ.
ᐆᒃᑑᑎᒋᓗᒋᑦ: ᐱᒋᐊᕐᑎᑦᓯᓗᓂ ᐱᕙᓪᓕᐊᑎᑦᓯᓂᕐᒥᒃ ᓴᐳᒻᒥᓂᕐᒥᒃ: ᐅᓪᓘᑉ ᕿᑎᖅᑲᖓᓂᒃ ᐱᓇᓱᐊᕐᑎᑦᓯᓗᓂ ᓄᓇᓕᓐᓂ ᐋᓐᓂᐊᕕᒻᒥ; ᐱᒋᐊᕐᑎᑦᓯᓗᓂ ᖃᐅᔨᒪᐅᑎᑦᓴᓂᒃ ᐊᖓᔪᖅᑳᖑᔪᑦ ᑐᑭᓯᕚᓪᓕᕈᑎᑦᓴᖏᓐᓂᒃ ᐱᐊᕋᐅᑉ ᐱᕈᖅᐸᓪᓕᐊᓂᖓᓂᒃ; ᐊᑐᖅᑕᐅᓕᕐᑎᑦᓯᒐᓱᐊᕐᓗᓂ ᓄᓇᓕᓐᓄᑦ ᐱᓇᓱᐊᖃᑎᒌᓐᓂᒥᒃ ᐃᓅᓱᒃᑐᓂᒃ ᐊᑦᑕᓇᖅᑐᒦᒍᓐᓇᓂᖏᓐᓂᒃ (ᒪᑯᓂᖓ hip hop ᑖᓂᓯᕐᓂᓄᑦ ᐱᓂᐊᕐᓂᐅᔪᓄᑦ); ᐃᓄᑑᓈᕐᑎᑐᓄᑦ ᓴᐳᒻᒥᓂᖃᕈᓐᓇᓯᓂᕐᒥᒃ ᐳᖅᑐᓂᕐᓴᓂ ᐃᓕᓴᕐᑐᑦ ᑭᖕᖒᒪᒋᔭᖏᓐᓂᒃ; ᐱᒋᐊᕐᑎᑦᓯᓗᓂ ᖃᕆᑕᐅᔭᑎᒍᑦ ᐃᓕᓴᕈᑎᑦᓴᐅᔪᒥᒃ ᐱᖕᖑᐊᕈᑎᒥᒃ; ᐊᓂᕐᕋᐅᑎᔭᐅᕙᑦᑐᓂᒃ ᐃᓕᓴᐅᑎᓂᒃ ᓴᐳᒻᒥᓂᖅ; ᑕᕐᕋᓕᔮᒐᓕᐅᕐᓗᓂ ᐃᓕᓴᕐᕕᒻᒥᑦ ᓄᖅᑫᓐᓇᓗᓂ ᐃᓱᐃᓗᑕᐅᓂᖓᓂᒃ; ᖃᕆᑕᐅᔭᑎᒍᑦ ᓴᐳᒻᒥᓗᓂ ᐊᓂᕐᕋᐅᑎᔭᐅᕙᑦᑐᓂᒃ ᐃᓕᓴᐅᑎᓂᒃ.
-
ᐱᓇᓱᐊᕐᓃᑦ ᓴᐳᒻᒥᓂᕐᒧᑦ ᐊᒻᒪ ᐊᖓᔪᖅᑳᖑᔪᓂᒃ ᐃᓚᒋᔭᐅᑎᑦᓯᒐᓱᐊᕐᓂᒥᒃ ᐱᐊᕋᖏᑦᑕ ᐃᓕᓴᕐᓂᖏᓐᓄᑦ.
ᐆᒃᑑᑎᒋᓗᒋᑦ: ᑲᔪᖏᖅᓭᓗᓂ ᐱᓇᓱᐊᖃᑎᒌᒍᓐᓇᓂᕐᒥᒃ ᐊᖓᔪᖅᑳᖑᔪᓂᒃ ᐃᓕᓴᕐᕕᓂᓪᓗ; ᐃᓕᓴᕐᑎᑦᓯᓗᓂ ᐊᖓᔪᖅᑳᖑᔪᓂᒃ ᖃᓄᖅ ᓴᐳᒻᒥᒍᓐᓇᒪᖔᑕ ᐱᐊᕋᐅᑉ ᐃᓕᑉᐸᓪᓕᐊᓂᖏᓐᓄᑦ; ᑲᑎᒪᓂᖃᕐᑎᑦᓯᓗᓂ ᐊᖓᔪᖅᑳᖑᔪᑦ ᐃᑲᔪᕈᓐᓇᓂᖏᓐᓂᒃ ᑎᑭᓯᒪᔪᒥᒃ ᐅᖄᔪᖃᕐᑎᓪᓗᒍ ᐊᒻᒪᓗ ᐃᑦᔭᕋᑦᓴᐅᒍᓐᓇᑐᓂᒃ; ᓴᐳᒻᒥᓗᓂ ᐊᖓᔪᖅᑳᖑᔪᓂᒃ ᐃᓄᓕᕆᔨᒃᑯᑎᒍᑦ ᐃᑲᔪᖅᑕᐅᕙᑦᑐᓂᒃ ᐊᒻᒪᓗ ᐱᐊᕋᖏᑦᑕ ᐯᕆᑦᓯᕕᒻᒧᑦ ᐃᓚᒋᔭᐅᑎᑦᓯᖏᑦᑐᓂᒃ; ᐃᑲᔪᖅᑐᐃᓗᓂ ᐊᖓᔪᖅᑳᖑᔪᓂᒃ ᐃᓕᓴᕐᕕᒻᒥᑦ ᐊᓂᕐᕋᐅᑎᔭᐅᕙᑦᑐᓂᒃ ᐃᓕᓴᐅᑎᓂᒃ ᐱᓇᓱᐊᖃᑕᐅᖃᑦᑕᖁᓪᓗᒋᑦ; ᖃᐅᔨᒪᐅᑎᑦᓴᓂᒃ ᐱᓇᓱᐊᕐᓂᐅᒍᓐᓇᑐᓂᒡᓗ ᐊᖓᔪᖅᑳᖑᔪᓄᑦ ᐱᐊᕋᕐᒥᓐᓄᑦ ᐊᓪᓚᓯᒪᔪᓂᒃ ᓄᐃᑦᓯᓗᓂ.
-
ᐱᓇᓱᐊᕐᓃᑦ ᓴᐳᒻᒥᒍᑎᑦᓭᑦ ᐊᓂᕐᕋᒥ ᐱᓂᐊᕐᓂᐅᕙᑦᑐᓄᑦ ᐃᓕᓐᓂᐊᓂᒧᑦ, ᐱᕙᓪᓕᑎᑦᓯᒍᓐᓇᑐᓂᒃ ᓄᓇᓖᑦ ᑭᖕᖒᒪᒋᔭᖏᑦᑕ ᓇᓗᓀᖅᑕᐅᓂᖏᓐᓄᑦ, ᐅᕝᕙᓗ ᐃᓕᓴᕐᑎᐅᑉ ᑲᔪᖏᖅᓴᑕᐅᒍᑎᒋᒍᓐᓇᑕᖏᓐᓄᑦ
ᐆᒃᑑᑎᒋᓗᒋᑦ: ᐃᓄᒃᑎᑑᕐᑐᓂᒃ ᑕᓚᕖᓴᒃᑯᑦ ᓄᐃᑕᑎᑦᓯᖃᑦᑕᓂᖅ; ᐃᓕᓴᐅᑎᑦᓴᓄᑦ ᐱᓇᓱᐊᕐᓃᑦ; ᐊᖓᔪᖅᑳᖑᔪᓄᑦ ᓴᐳᒻᒥᓃᑦ ᐃᓄᓕᕆᔨᒃᑯᑎᒍᑦ ᐃᑲᔪᖅᑕᐅᓲᓂᒃ ᐊᒻᒪᓗ ᐱᐊᕋᖏᑦᑕ ᐯᕆᑦᓯᕕᓐᓄᑦ ᐃᓚᒋᔭᐅᖏᓐᓂᖏᓐᓄᑦ; ᐱᓇᓱᒐᑦᓭᑦ ᐊᑦᔨᒌᖏᑦᑐᑦ ᐊᑐᐃᓐᓇᐅᑎᑕᐅᓂᖏᑦ ᐊᒻᒪᓗ ᐱᓇᓱᒐᕆᔭᐅᖃᑦᑕᑐᑦ; ᓄᐃᑦᓯᓗᓂ ᑕᕐᕋᓕᔮᒐᕐᓂᒃ ᐱᓇᓱᒐᕆᔭᐅᖃᑦᑕᑐᓂᒃ ᓇᒻᒥᓂᖅ ᓂᕈᐊᕐᑕᒥᓐᓂᒃ; ᐱᒋᐊᕐᑎᑦᓯᓗᓂ ᑕᕐᕋᓕᔮᒐᕐᓂᒃ ᐃᓕᓴᕐᓱᑎᒃ ᐱᔭᕇᕈᑎᑖᕐᑐᓂᒃ ᐊᒻᒪᓗ ᐱᓇᓱᓐᓂᒧᑦ ᐊᑑᑎᓯᒪᓕᕐᑕᖏᓐᓂᒃ; ᓄᐃᑕᑎᑕᐅᖃᑦᑕᓗᑎᒃ ᐱᓇᓱᒐᐅᔪᑦ-ᑐᓴᕋᑦᓴᐅᑎᓪᓗᒋᑦ ᐅᖃᐅᓯᐅᖃᑦᑕᓗᑎᒃ ᑐᓴᐅᑎᒃᑯᑦ.
-
ᐱᓇᓱᐊᕐᓂᐅᔪᑦ ᓴᐳᒻᒥᒍᑕᐅᑦᓱᑎᒃ ᐊᑕᐅᓯᕐᒧᑦ ᐅᕝᕙᓗ ᐊᒥᓱᓄᑦ ᐃᓕᓴᕐᓂᒧᑦ ᐅᑎᖅᑎᑦᓯᒍᑕᐅᓯᒪᔪᑦ ᑲᑦᓱᙰᓕᑎᑕᐅᓯᒪᔪᓪᓗ (ᐃᓚᒌᓄᑦ, ᐃᓄᒻᒧᑦ ᐊᒻᒪᓗ ᐊᕙᑎᒥᐅᑕᓄᑦ ᐱᓇᓱᐊᕐᓂᐅᔪᑦ, ᓄᓇᓕᓐᓄᑦ ᐱᐊᕃᑦ ᒥᑭᔫᑎᓪᓗᒋᑦ ᐃᓕᑉᐸᓪᓕᐊᓂᕕᓂᖏᑦ, ᐊᓯᖏᓪᓗ.)
ᐆᒃᑑᑎᒋᓗᒋᑦ: ᐅᓂᒃᑲᐅᓯᕐᓂᒃ ᐊᑐᐊᒐᑦᓴᑕᖃᕐᓗᓂ ᓄᓇᓕᓐᓂ ᐱᖕᖑᐊᕕᐅᔪᓂ; ᐅᓪᓘᑉ ᕿᑎᖅᑲᖓᓂᒃ ᐱᓇᓱᐊᖃᑕᐅᖃᑦᑕᓂᖅ ᓄᓇᓕᓐᓂ ᐋᓐᓂᐊᕕᓐᓂ; ᐅᐱᕐᖔᒃᑯᑦ ᐊᐅᓪᓛᓯᒪᓃᑦ (ᐅᐱᕐᖏᓃᑦ) ᐃᓅᓱᑦᑐᓕᕆᓃᑦ, ᐱᓗᐊᕐᑐᒥᒃ ᐃᓕᓭᓂᕐᒨᓕᖓᔪᑦ ᐊᒻᒪᓗ ᑭᓯᑦᓯᒍᑎᓂᒃ ᐃᓕᓭᓃᑦ; ᐃᓕᓭᓃᑦ ᐊᒻᒪ ᐊᖓᔪᖅᑳᖑᔪᓄᑦ ᓴᐳᒻᒥᔭᐅᑦᓱᑎᒃ ᐃᓕᓐᓂᐊᓃᑦ; ᐊᑐᐊᒐᑦᓴᓂᒃ ᓄᐃᑎᑦᓯᓃᑦ ᐃᓅᓱᒃᑐᓅᓕᖓᔪᓂᒃ; ᐃᓕᓐᓂᐊᓂᕐᒥᒃ ᖃᐅᔨᓴᕈᑏᑦ ᓄᓇᓖᑦ ᐱᖃᑕᐅᑦᓯᐊᓯᒪᒻᒪᖔᑕ.
-
ᐱᓇᓱᐊᕐᓂᒥᒃ ᓴᐳᒻᒥᒐᔭᕐᑐᒥᒃ ᐃᓕᓴᕐᕕᒻᒥ ᑲᔪᖏᖅᓭᓂᐅᔪᒧᑦ ᐱᒋᐊᕐᓗᓂ ᐱᐊᕋᐅᑉ ᐃᓕᓴᕆᐊᓕᕐᓂᖓᓂᑦ ᐳᖅᑐᓂᕐᓴᒧᑦ ᐃᓕᓴᕐᓂᖓᓄᑦ ᑎᑭᓪᓗᒍ.
-
ᓇᓪᓕᖏᑦ ᑮᓇᐅᔭᖃᕐᑎᑕᐅᒍᒪᐅᑎᓂᒃ ᑕᑕᕐᓭᒍᓐᓇᐸᑦ?
ᓇᓪᓕᖏᑦ ᑎᒥᐅᔪᑦ ᐱᖃᑕᐅᕙᑦᑐᑦ ᐅᕝᕙᓗ ᐃᓱᒫᓘᑎᖃᕐᑐᑦ ᐃᓕᓴᕐᑏᑦ ᑲᔪᖏᕐᓴᑕᐅᓂᖏᓐᓂᒃ ᓄᓇᕕᒻᒥ ᑕᒪᒃᑯᐊ ᑮᓇᐅᔭᖃᕐᑎᑕᐅᒍᒪᐅᑎᓂᒃ ᑕᑕᕐᓭᓗᑎᒃ ᐊᐅᓪᓚᑎᑦᓯᒍᓐᓇᐳᑦ. ᑲᑐᑦᔨᓗᑎᒃ ᑎᒥᐅᔪᑦ ᐃᓄᑐᐊᖑᔪᓪᓗ ᓄᓇᓕᓐᓂ ᑕᒪᒃᑯᐊ ᑲᔪᖏᕐᓴᑕᐅᒻᒪᕆᑉᐳᑦ ᑲᔪᓯᑎᑦᓯᒍᓐᓇᓯᖁᔭᐅᑦᓱᑎᒃ ᑲᑎᕐᓱᑕᐅᓗᑎᒃ ᐱᒋᐊᕐᑎᑦᓯᔪᓐᓇᓯᖁᓪᓗᒋᑦ ᓯᕗᓂᑦᓴᓕᐅᕆᓂᕐᒥᒃ.
-
ᖃᑦᓯᓂᒃ ᑮᓇᐅᔭᖃᕐᑎᑕᐅᒍᑎᑦᓴᓂᒃ ᐱᕕᑦᓴᐅᒐᔭᕐᐸ?
ᑮᓇᐅᔭᖃᕐᑎᑕᐅᔪᖃᕈᓐᓇᐳᖅ $25,000-ᓂᒃ ᐱᓇᓱᐊᕐᓂᐅᔪᒧᑦ ᐊᑐᑦᑕᐅᓚᖓᔪᓂᒃ. ᐅᓄᕐᓂᐹᖃᕐᑎᓪᓗᒋᑦ $100,000-ᓄᑦ ᐱᓇᓱᐊᕐᑎᑦᓯᓂᕐᒥᒃ ᐱᓇᓱᐊᕐᑐᖃᕈᓐᓇᐳᖅ ᓄᓇᓕᓐᓄᑦ ᐱᖓᓱᓄᑦ ᐅᕝᕙᓗ ᐅᓄᕐᓂᕐᓴᓄᑦ. (ᐃᓱᒪ-ᑯᓐᓄᑦ ᑮᓇᐅᔭᖃᕐᑎᑕᐅᓃᑦ ᐃᓚᔭᐅᒋᐊᕈᓐᓇᐳᖅ ᑮᓇᐅᔭᑦ ᙯᑕᐅᓯᒪᔪᑦ ᑖᑦᓱᒧᖓᑦᓭᓐᓇᖅ ᐱᓇᓱᐊᕐᓂᐅᑎᑕᐅᔪᒧᑦ ᐊᓯᖏᓐᓂᑦ ᑮᓇᐅᔭᕐᑖᕕᑦᓴᔪᓂᑦ)
ᐱᓇᓱᐊᕐᓂᐅᔪᖅ ᓯᕕᑐᓂᖃᕈᓐᓇᐳᖅ ᐱᓇᓱᐊᕈᓯᕐᓂᒃ 52-ᓂᒃ ᐊᒻᒪ ᐊᑐᓕᕐᑎᑕᐅᓂᖃᕆᐊᖃᕋᔭᕐᓱᓂ ᐱᒋᐊᕐᓗᒍ ᐁᕐᕆᓕ 1, 2014-ᒥᑦ, ᐊᐅᒡᒍᓯ 31, 2015-ᒧᑦ.
ᐱᐅᒃᑯᑎᑦᓴᓪᓚᕆᐅᔪᓄᑦ ᑮᓇᐅᔭᕐᑐᕈᑏᑦ ᐅᕝᕙᓗ ᐊᐅᓚᓂᑐᐃᓐᓇᓪᓚᕇᑦ ᑎᒥᐅᔪᒧᑦ ᑕᒪᒃᑯᐊ ᑮᓇᐅᔭᖃᕐᑎᑕᓂᕐᒧᑦ ᐱᓇᓱᐊᕐᖃᔭᖕᖏᓚᑦ. ᐊᒻᒪᓗ ᐱᓇᓱᐊᕐᓂᐅᓕᕇᕐᑐᑦ ᑕᒪᒃᑯᐊ ᐱᓇᓱᖅᑲᔭᕐᒥᓇᑎᒃ ᑮᓇᐅᔭᖃᕐᑎᑕᐅᓂᑦᓴᒥᒃ.
-
ᖃᖓᒃᑯᑦ ᐃᓱᓕᓐᓂᖃᕋᔭᕐᐸ ᑮᓇᐅᔭᖃᕐᑎᑕᒍᑎᑦᓴᒧᑦ ᑕᑕᕐᓭᒍᑏᑦ ᐊᐅᓪᓚᑎᑕᐅᔪᓐᓇᓂᖏᑦ?
ᑮᓇᐅᔭᖃᕐᑎᑕᐅᓂᕐᒧᑦ ᑕᑕᕐᓴᒐᑦᓭᑦ ᐊᓪᓚᕕᑦᓭᑦ ᐱᔭᑦᓴᐅᕗᑦ ᐅᕙᖕᖓᑦ https://www.krg.ca/iu/employment-a-training-iu/programs-iu
ᐊᓪᓚᑕᐅᓯᒪᔪᑦ ᑕᑕᕐᓴᕆᐊᓖᑦ ᐊᐅᓪᓚᑎᑕᐅᒋᐊᖃᕐᐳᑦ ᐅᕗᖓ: projects@esuma.ca ᑌᒪ ᖃᐅᔨᓴᕐᑕᐅᓂᐊᓕᕐᒪᑕ ᓯᕗᓪᓕᐹᑦ ᑎᑭᑦᑐᕕᓃᑦ ᓯᕗᓪᓕᐅᑎᔭᐅᖃᑦᑕᑎᓪᓗᒋᑦ.
